धेरैजसो बलिउड स्टारहरु प्रायः फराकिलो ठाउँ भएको डुप्लेक्स अपार्टमेन्टमा बस्न रुचाउँछन् । बलिउडका बादशाह भनेर चिनिने किङ खान अर्थात् शाहरुख खान कस्तो घरमा बस्छन् त ? शाहरुख खानका विभिन्न देशका शहरमा आलिशान घरहरु रहेको छ । उनले विभिन्न मुलुकमा आलिशान बंग्लो तथा अपार्टमेन्टमा लगानी गरेका छन् । भारतको मुम्बई, दिल्लीदेखि लिएर देश बाहिर दुबई, बेलायतमा पनि उनले महँगा मूल्यका घर किनेका छन् ।
बलिउडमा सबैभन्दा महँगो कलाकारमध्ये पर्छन् शाहरुख खान । शाहरुख वास्तवमै उच्चस्तरको जीवनशैलीमा विश्वास राख्ने गर्छन् । करिअरको शुरुवाती चरणमा उनले धेरै कठिन संघर्ष गरे र उनको कडा परिश्रम, जोश र दृढ सङ्कल्पको कारणले गर्दा आज उनले आफू र आफ्नो परिवारको लागि साँचेका सबै सपनाहरु पुरा गर्न सफल भएका छन् । अहिले उनी धनाढ्य भारतीय सेलिब्रेटी मध्येको एकमा पर्छन् । उनीसँग अहिले मुम्बईमा मन्नत, दिल्लीमा नेष्ट हाउस, दुबईमा जन्नत, बेलायतमा भ्याकेसन होम गरी थुप्रै आलिशान तथा विलासी घरहरु रहेका छन्।
आज हामी शाहरुखको मुम्बईमा रहेको मन्नतको बारेमा चर्चा गर्दै छौं । शाहरुख र उनकी पत्नी गौरी खान पहिला कार्टर रोड, बान्ड्रा वेस्ट, मुम्बईमा रहेको श्री अमृत अपार्टमेन्टको सातौं तल्लामा तीन बेडको फ्ल्याटमा बस्थे । यस अपार्टमेन्टको बसाईमा उनी सन्तुष्ट नै थिए तर उनलाई एउटा ठूलो प्रार्थना कोठाको अभाव महशुस हुन थाल्यो । यसैले उनी मुम्बईमा कुनै ठूलो र राम्रो घरको खाजीमा लागे ।
सन् २००१ मा उनको घर खोज्ने कामले पूर्णता पायो, जब उनले मुम्बईमा २६,३२८.५२ वर्ग फुटको सुन्दर बंग्लो भेट्टाए । त्यसबेला उनले त्यो बंग्लो १३.३२ करोड भारतीय रुपैयाँमा खरिद गरेका थिए जसको मूल्य आजको दिनमा २०० करोड भारतीय रुपैयाँ अर्थात् ३ अर्ब २० करोड नेपाली रुपैयाँ रहेको छ ।
अहिले यो बंग्लोको क्षेत्रफल ४३,००० वर्ग फुट रहेको छ । यस बंग्लोको नाम पहिले ‘भिल्ला भियन्ना’ रहेको थियो जसका मालिक गुजरातका किको गान्धी थिए । शाहरुखले यस बंग्लोको नाम ‘जन्नत’ राख्न चाहन्थे तर यो घर किनिसकेपछि उनका सबै कामनाहरु पुरा भएकोले गर्दा उनले यस घरको नाम ‘मन्नत’ राखे । ‘मन्नत’को शाब्दिक अर्थ प्रार्थना हुन्छ ।
उनकी पत्नी गौरी आपैmमा एक इन्टेरियर डिजाइनर भएकोले आफ्ना फर्निचर डिजाइनर टम डिक्सनसँग मिलेर यस बंग्लोको सबै कुनाकुनामा अत्याधुनिक र आकर्षक डिजाइनका संरचना थपेर यसलाई नयाँ तथा पृथक शैलीको बनाएर एउटा मास्टरपिस घर बनाउन सफल भइन् । यो बंग्लोको सामुद्रिक किनार अर्थात् पर्यटकीय क्षेत्रमा पर्छ । यसको मोहडा समुद्रतिर फर्किएको छ । यसको एकापट्टि विशाल भान्साघर, शाहरुखको कार्यालय, स्टुडियो र सु–सज्जित जिम हल रहेको छ । यसभित्र लिफ्ट पनि रहेको छ । दुईवटा विशाल लिभिङ रुम जसमा एमएफ हुसेनका पेन्टिङ र अन्य कलाकृतिको सजावट छ ।
यो घरको एउटा पुरै तल्ला बच्चाहरुको प्लेयिङ रुम, लाइब्रेरी, बार र मनोरञ्जन क्षेत्रको रुपमा छुट्याइएको छ । यस सुन्दर घरको अगाडि आकर्षक बगैंचा छ । ६ तल्लाको लोभलाग्दो बंग्लोमा ड्रइङ रुम, बेसमेन्ट पार्किङ, टेनिस कोर्ट, स्विमिङ पुल, प्राइभेट मुभी थिएटर रहेका छन् ।
यसको विशाल फ्रेन्च झ्यालबाट समुद्रको मनमोहक दृश्यावलोकन गर्न सकिन्छ । यसलाई अहिलेको स्वरुपमा ल्याउनलाई करिब एक दशक लागेको बताइन्छ । यो बंग्लोमा अहिले परम्परागत तथा आधुनिक सजावटको संयोजन समेटिएको छ । रोचक तथ्य त के छ भने किङ खानले प्रत्येक वर्ष मनसुनको समयमा आफ्नो यस घरको बाहिरी संरचनालाई प्लाष्टिकले ढाक्ने गरेका छन ।
बलिउडका बादशाह शाहरुख खानको एक झलक पाउनका लागि हरेक दिन सयौको सङ्ख्यामा उनका प्रशंसकहरु यस घरको बाहिर आउने गर्छन । शाहरुख खानले आफ्नो टेरेसमा सानो ठाँउ बारेर (घेरेर) बनाएका छन् । विशेष दिनमा त्यहाँ उभिएर उनले आफ्ना प्रशंसकहरुलाई अभिवादन गर्छन् ।
हालै उनका एक प्रशंसकले ट्विटरमा ‘मन्नत’ बेच्न लाग्नुभएको हो भनेर उनलाई गरेको प्रश्नको जवाफमा उनले ‘भाई, ‘मन्नत’ (प्रार्थना) कहिले पनि बिक्दैन, शिर झुकाएर माग्नु पर्छ । यो कुरा याद गरेमा जीवनमा आपूmले चाहेको कुरा पाउन सकिन्छ’ भन्ने गहकिलो जवाफ दिएका छन् । एजेन्सीको सहयोगमा
